كده بقا تبقي ضؤرمه ولهلوبه على حق

باختصار وبدون رغي كتير
حانزلكم النهاردة الجدول اللي بامشي عليه عشان بيتي يكون دايماً نضيف ومترتب

وجزء من الافكار دي كنت كتبتها ع البيدج بتاعتي ع الفيس
100 حاجة مطلوبة منك في اليوم
بس الفكرة انك دايماً تنظمي افكارك ووقتك

يعني انا دايماً بامشي بالورقة والقلم
والموضوع ده بيريحني جداً
طبعاً لأن اعراض الالزهايمر المبكرة بدأت تظهر علي
وشكلي حاكلم نفسي قريب

المهم...
اتعودي كل حاجة تمشي بالنظام ده
خدي 5 دقايق كل يوم قبل النوم
تحددي فيها لنفسك " ايه المطلوب مني بكرة بإذن الله"
وخلي الموضوع ده عادة يومية وياريت لو يكون في اجندة او كراسة صغيرة
والحاجة اللي تخلص علمي عليها

واكتبي كل حاجة
صغيرة او كبيرة
واكتبي ترقيم ليهم
يعني الحاجة المهمة اوي او المستعجلة خليها دايماً في الاول

وممكن تستخدمي الورق اللي موجود ع النت
واسمه to do list

ودي بتسهل علي كتير اوي
لأن فيها مكان للحاجات المطلوبة مني
والوجبات اللي ممكن اعملها
والحاجات اللي ناقصاني عشان اشتريها
وبالنسبة لموضوع الجدول فأنا رأيي ان اللي المسألة مش جدول تمشي عليه بالضبط قد ما هي اساسيات بتسهل عليكي متابعة كل حاجة في بيتك

لأن كل بيت ظروفه تختلف عن التاني
وساعات حاجة تتغير فإنتي ساعتها تحتاسي
الاصح من وجهة نظري انه يكون لينا خطوط عريضة في حياتنا
والاهم انه يكون فيها مرونة
عشان ظروف حياتنا ممكن يحصل فيها حاجات فجأة فتبقي انتي في التمام

وافتكري دايماً ان أهم حاجة محتاجة تترتب وتتنظم عشان تكوني ست بيت مفيش زيك هي أفكارك ووقتك

لازم تحددي مسئولياتك وأهدافك بوضوح لنفسك
واكتبيها في ورقة عشان دايما تفكري نفسك

نرجع يا بنات نكمل كلامنا ع الجدول الاسبوعي

او بمعنى اصح تقسيمة الشغل على ايام الاسبوع

السبت
وده باعمل فيه الريسبشن
عشان بداية الاسبوع والواحد بيتشغل
وممكن ضيف يجيلك فجأة
وطبعاً لازم يكون مكان الاستقبال جاهز ونضيف

وده بالاضافة لموضوع الربع ساعة اللي قلنا عليه يتعمل كل يوم
وبرضه حنتكلم عنه بشكل مستفيض في موضوع منفصل بإذن الله

الأحد
باعمل فيه الليفنج بضمير
يعني بامسحه وانضف الشباك والحيطان
واهوي السجادة طبعاً
ولو الفرش بتاع الانتريه محتاج يتغسل
يبقى تبدأي بيه اول حاجة

وعادة موضوع غسيله هو والسجادة بيكون اول احد في الشهر

وطبعاً باعمله الاحد الصبح عشان قعدة وشغل الاسبوع كله
يعني احنا بناكل فيه وبنتفرج ع التليفزيون وكمان الكمبيوتر موجود فيه
وبنقضي معظم وقتنا فيه

الاثنين
المطبخ حبيبي
يعني شوية الشغل الاسبوعي التمام مش ع الوش وبس

وده مش داخل فيه غسيل الاطباق
او اي حاجة مرتبطة بالطبخ

الثلاثاء
وده للحمام + البلكونة

الاربعاء
باعمل فيه اوضة ولادي
عشان لما يرجعوا يوم الخميس
اللي هوا بداية اجازتهم تكون الاوضة رايقة
ومستعدة لاستقبال هجومهم الشرس عليها

الخميس
ده باعمل فيه اوضة النوم مملكتي
عشان جوزي يلاقي الاوضة بتلمع قبل يوم اجازته

ودي بتشمل تهوية السجاد وتنضيف الشبابيك والحيطان
وتغيير الملاية وتعطير المرتبة
وتلميع الخشب واي حاجة في الاوضة محتاجة تظبيط

الجمعة
ده بقى يوم الاجازة بتاع جوزي
والصراحة مش باحب اعمل فيه شغل البيت

مش الراجل يقعد اجازة يلاقيني قالبة الشقة وحاطاها

ماهو من اسرار الست اللهلوبة
ان جوزك يشوفك دايماً برنسيسة
يعني شعرك متسرح
هدومك نضيفة
ريحتك حلوة
وكمان يبقى البيت بيلمع

مش لازم كل حاجة تحصل قدامه يعني
وحتى لو حتقولي ولادك اشقياء
نظمي مجهودك ومواعيد نومك وكله حيتسهل بإذن الله

وبالطريقة دي زي ما قلنا حتبقى ايدك في الشقة على طول
وحتلقيها جنة بإذن الرحمن

انا عندي 3 بيبي (توام سنتين ونص وولد سنه و9 شهور) واشقياء جدا جدا جدا جدا مش قادره اقولك قد ايه وحاولت اني اعمل موضوع الجدول ده وانظم وقتي ما نفعش مع وجودهم معايا ومفيش حد ممكن اسيبهم عنده ولو نص ساعه مش عارفه اعمل ايه انا بقيت اسيب الشقه يبهدلو فيها براحتهم قبل ما جوزي يرجع من الشغل ابتدي تنظيف علشان لما يرجع من الشغل يكون البيت نظيف لكن التنظيف التقيل بجيب واحده مرة كل شهر بتعملهولي وانا بقعد بالعيال

حلو قوى دا انا كنت بعمل كله فى يوم واحد واخر اليوم افضل اصوت من التعب بس المشكله بمجرد قدوم اولادى م المدرسه تعبى بيروح هدر

» علشان تبقي موزه رشيقه
» لكل ضؤرمه على وش جواز احذري هذا الرجل
» لكل ضؤرمه على وش جواز احذري هذا الرجل
» sara ghulam منوره المنتدى ومبروك بقيتي اول ضؤرمه معانا